陳展鵬舉家富國島旅行　佛山宣傳獲邀Busking感興奮

08月08日(五) 10:01新聞觀看次數：1.3k

視帝陳展鵬近日與太太單文柔(Phoebe)及女兒小豬比到越南富國島旅行，之前Phoebe於社交網PO了索爆的水着照，不少網民留言對她的泳衣設計大感興奮，故她再派福利，PO了一張全家福，但相中的她比之前更性感，原來泳衣背後只有幾條幼帶綁住，相中她與展鵬齊齊把小豬比堆於沙內，狀甚搞笑，而小豬比之後又於草地上扮袋鼠跳，活動又可愛。

單文柔與展鵬把小豬比堆於沙內，狀甚搞笑。

小豬比玩得相當盡興。

而展鵬本月16日會先到美國開音樂會，之後23日將於佛山開音樂會，日前他亦已到佛山拍攝節目及宣傳，當時有人邀請他跟現場Busking的人合唱，展鵬即埋去唱兩句，吸引不少人圍觀。展鵬接受東網訪問時謂：「之後我都會帶埋小豬比上去，會做一個殘疾運動員的慈善活動，依家未開劇，可以有更多時間畀我做其他嘢，嚟緊我會出新歌，之後會錄音，到時喺音樂會上唱畀大家聽，好開心新加坡同馬來西亞嘅粉絲都會嚟捧場，第二日我哋會搞Fans Club 10周年慶祝活動，佢哋好多都未返過內地，等佢哋感受吓當地文化，到時會同佢哋周圍遊覽、食吓當地美食，都已經安排好晒。」展鵬坦言這一、兩年就如重新在音樂工作開始一樣，「都放咗好多心機落去，我每日都會喺屋企練歌，新歌自己做埋製作，好開心有時間畀我做自己喜歡嘅嘢。」

陳展鵬將在佛山開音樂會，現積極練歌。

陳展鵬佛山宣傳獲邀Busking。

陳展鵬開唱，大批途人圍觀。