【璀璨之城丨張智霖夥吳卓羲演豪門兄弟 另類相處關係考驗兩人演技】

新劇《璀璨之城》集合張智霖、吳卓羲、姜大衞、張曦雯、高海寧、陳煒、陳曉華、陳瀅等華麗陣容，一眾演員齊集電視城圍讀劇本，Chilam同阿Ron喺內地不時合作拍攝綜藝，不過講到拍劇，最近一次經已係12年前嘅《衝上雲霄2》。今次新劇中佢哋將飾演一對豪門親兄弟，但就會以一種另類方式相處，佢哋都話要諗吓點樣演出。

劇中Chliam同Ron分別與高Ling及Kelly做夫妻，講到兩位女神身高都唔矮，Ron笑言呢部係男人戲，若果女演員高過男人就唔叫男人戲咁話，Chilam更笑指叫各位女演員自己執生，Ron提醒拍檔要遷就高度展現小鳥依人一面。

高Ling、Kelly同Ron飾演三位青梅竹馬嘅朋友，但高Ling事前直認緊張，因為跟阿Ron唔係好熟，仲自爆冇對方電話，不過高Ling希望開劇前跟對方混熟，身邊嘅Ron就話「妳都唔得閒，要開《新聞女王2》，唔通我哋去深圳搵妳咩？」抱病出席嘅Kelly話新劇《俠醫》踏入拍攝尾聲，所以圍讀後要再回合劇組繼續拍攝。

John哥身為劇中嘅大家長，飾演Chilam同Ron嘅爸爸，多年前先後跟兩位後輩合作，今次係三人首次同劇，John哥都非常期待。講到今次劇中角色，佢覺得每次演繹嘅角色都要有唔同，今次會尋找新嘅演法。邵初喺劇中演John哥嘅細囡，周志康就飾演佢老公。陳瀅就相當期待去澳門同珠海等地取景，因為離開香港出外拍攝，會令成個人嘅專注力更集中，而Hera就預告有大膽演出。