《2024香港小姐競選》於無綫官方社交平台陸續公開15強佳麗（1號陳紫佟Jessie、2號倪樂琳Ellyn、3號王汛文Candice、4號謝淑怡 Zoie、5號莊曉婷Kimmy、6號李曼思 Adria、7號秦冀雯Yvonne、8號盧凱怡Kerry、9號陳甜甜Rose、10號吳芷靖Clary、11號梁嘉莹Emily、12號鍾翠詩Tracy、13號程姜月Dolores、14號楊梓瑤Amina及15號俞可程Kanis）童年照，15強佳麗還各自接受了See Saw先獨家專訪，大爆兒時趣事。

觀乎15張「Q版港姐」童年照，不難發現不少佳麗的美貌是三歲定八十，當中2號倪樂琳、3號王汛文、4號謝淑怡、8號盧凱怡及12號鍾翠詩的童年照更是靚到不得了，有人眼仔睩睩，有人笑容甜美。「甜美笑容」代表12號鍾翠詩拍攝宣傳片時，「神還原」了兒時招牌篤面珠可愛手勢，並笑言：「細個嗰時嘅我好鍾意笑同影相，唔鍾意喊」；至於「眼睩睩」代表2號倪樂琳，則笑稱小時候是搞怪小妹：「我細個比較古靈精怪，見到鏡頭會好鍾意唱歌同跳舞，做啲好搞怪嘅動作。例如我鍾意喺媽咪想影我優美咁彈琴嘅時候，好似傻咗咁boom boom boom亂彈。」又笑言相關性格適合參選港姐：「因為唔會令氣氛冷場。」2號倪樂琳說畢更即時向鏡頭展現瘋狂＋驚喜「搞怪表情包」，十分可愛。